TIRANË– Zbulimi i kamerave të vendosura nga bandat kriminale në rrugët dhe kryqëzimet kryesore të Shkodrës ka alarmuar policinë. Kështu mësohet se Drejtori i Përgjithshëm i Policisë së Shtetit Muhamet Rrumbullaku ka urdhëruar të gjithë drejtorët në 12 qarqet e vendit për të luftuar krimin e organizuar përmes identifikimit të autorëve të vendosjes së kamerave të sigurisë të paautorizuara nëpër hapësirat publike.
Rrumbullaku u ka kërkuar drejtuesve vendore të policisë të identifikojnë kamerat e sigurisë që janë pa zot, që nuk janë në emër të askujt dhe nuk justifikojnë vendin e instalimit, në hapësira ku konsiderohen si vende me lëvizje të anëtarëve të grupeve kriminale.
Në fokus janë qarqet më problematike sa i përket krimit të organizuar si Vlora, Elbasani, Durrësi, Tirana dhe Fieri. Janë urdhëruar operacione të veçanta për identifikimin dhe çmontimin e këtyre kamerave në rrugë që mund të dekonspirojnë operacionet e Policisë së Shtetit dhe kërcënojnë jetën dhe sigurinë e njerëzve.
