TIRANË– Prej disa ditësh tashmë, jo vetëm Myzeqeja por dhe Tirana ka qenë e mbushur plot e përplot me karkaleca cka ka vendosur banorët ne alarm. Lidhur me fenomenin, në një lidhje të drejtëpërdrejtë me emisionin “Sot Live në Shqipëri” në Report TV, Rozafat Sopaj, drejtor i Shërbimeve në Bashkinë e Tiranës, tha se karkaleci nuk është shqetësues. Sipas tij karkalecat do të zhduken në 15 ditëshin e muajit gusht.
“Karkaleci nuk është një nga shqetësimet kryesore që ka bashkia e Tiranës pasi insektet janë masive në të gjithë kohën e vitit. Karkaleci ndër ta është ndër më të padëmshmit. Më shqetësim është mushkoja e miza si transmetues të viruseve sesa karkaleci. Është një karkalec migrator që ka përfshirë jo vetëm Tiranën por të gjithë Ballkanin. Nuk është shqetësues, nuk pickon. Nuk është i dëmshëm në masë as për bujqësinë. Nuk kemi çfarë i bëjmë se është migrator. Sepse karkaleci në habitatin e vet e ka në zonat bujqësore, por këtij lloj karkaleci i pëlqen drita. Por nuk është shqetësues, pavarësisht bezdisjes. Ju siguroj që brenda muajit gusht, në 15 ditëshin e dytë të muajit gusht nuk do të dëgjoni më të flitet për karkaleca. Ju siguroj që produktet që përdorim ne për dezinsektim janë të certifikuara,”-tha Rozafat Sopaj
