KORÇË- Edicioni i 16-të i karnavaleve i ka uruar mirëseardhjen në Katedrale qytetarëve të Korçës e jo vetem. Mësohet se në aktivitetet maratonë që janë planifikuar për këtë edicion do të marrin pjesë 30 grupe të ndryshme nga vendi por edhe nga vende të tjera, si Maqedonia e Veriut, Greqia, Bosnja e Hercegovina. Aktiviteti, i cili përkon edhe me çeljen e sezonit turistik ka nisur prej mëngjesit të sotëm e cila do të vijojë deri në darkë.
Karnavalet kanë filluar të festohen në Korçë para viteve ’40, periudhë në të cilën jeta kulturore në këtë qytet ka qenë e larmishme. Megjithëse një festë pagane, Karnavalet më vonë festoheshin ditën e Ndjesave në muajin Shkurt. Në këtë periudhë, karnavalet shoqëroheshin me mandolina, kitara dhe këngë humoristike. Festimi i Karnavaleve u ndërpre pas viteve ’60, për të rifilluar në kushte të tjera shoqërore pas viteve ’90.
