SHKODËR– Një 47-vjeçar ka rënë në prangat e policisë së Shkodrës. Luan Shpingari u arrestua në flagrancë në një restorant pasi mbante një pistoletë me vete. Ai do të përballet me akuzën e armëmbajtjes pa leje. Blutë e Shkodrës bëjnë me dije se arma ishte me fishek në fole dhe gati për qitje. Mbetet ende e paqartë nëse 47-vjeçari do të vriste ndonjë person. Grupi hetimor po heton për zbardhjen e ngjarjes.
NJOFTIMI I POLICISË:
Shkodër/Kontrolle të shtuara për evidentimin dhe goditjen e veprimtarisë kriminale të armëmbajtjes pa leje. Mbante armë zjarri në restorant, me fishek në fole, gati për qitje, tentoi të largohej kur pa shërbimet e Policisë, kapet dhe vihet në pranga 47-vjeçari. Sekuestrohet arma e zjarrit pistoletë që mbahej pa leje nga 47-vjeçari me precedent kriminal në fushën e krimit të organizuar. Shërbimet e Komisariatit të Policisë Shkodër, në vijim të kontrolleve në ambiente të ndryshme, për kapjen e personave që qarkullojnë me armë zjarri apo sende të tjera të kundërligjshme, bazuar dhe në informacionet e siguruara përmes inteligjencës informative, për një shtetas që qarkullonte me armë, kanë organizuar menjëherë punën për lokalizimin dhe kapjen e tij.
Gjatë kontrolleve, në një restorant, në vendin e quajtur “Sarreç”, shërbimet e Policisë kanë lokalizuar shtetasin L. Sh. që mbante një armë, i cili kur ka parë shërbimet e Policisë, ka tentuar të largohet me vrap, por është neutralizuar dhe vënë në pranga menjëherë nga shërbimet e Policisë. Arma e zjarrit pistoletë u sekuestrua në cilësinë e provës materiale. Në përfundim të veprimeve shtetasi L. Sh., 47 vjeç u arrestua në flagrancë dhe materialet i kaluan prokurorisë, për veprime të mëtejshme.
