Kandidati i Partisë Demokratike në Tiranë, Belind Këlliçi, ka ngritur akuza të forta publike, duke deklaruar se punonjës të OSHEE-së në kryeqytet po kërcënohen me humbje të vendit të punës nëse nuk sigurojnë nga 10 votues për Ministrin e Brendshëm në detyrë, Ervin Hoxha.
Sipas tij, këtyre punonjësve u është shpërndarë një formular me emra, ndërsa janë vendosur nën presion të drejtpërdrejtë për të garantuar votën. Këlliçi ka publikuar edhe dy numra telefoni, që sipas tij, përdoren për të verifikuar votuesit e shënuar.
“Ky patronazhim po ndodh aktualisht dhe do të vazhdojë deri të premten, një ditë para heshtjes zgjedhore”, deklaroi ai në rrjetet sociale. Këlliçi i kërkon Task Forcës së SPAK-ut të ndërhyjë menjëherë, duke theksuar se ka prova të mjaftueshme për të nisur procedim penal.
“Manipulimi i votës është i hapur dhe çdo vonesë është e pajustifikueshme”, përfundon ai.
