TIRANË– Kryeministri Edi Rama ka reaguar këtë të hënë në lidhje me kërcënimet ndaj Malit të Zi dhe Maqedonisë së Veriut nga Serbia. Sipas Ramës ato janë vendet të NATO-s dhe se e shkuara nuk duhet lënë që të na tërheqë pas.
Edi Rama: Kërcënimet kundër stabilitetit dhe integritetit të Maqedonisë së Veriut dhe Malit të Zi janë të rrezikshme dhe të papranueshme. Të mos harrojmë se Shqipëria, Maqedonia e Veriut dhe Mali i Zi janë aleatë të NATO-s plotësisht të përkushtuar ndaj sigurisë dhe integritetit territorial të njëri-tjetrit. Ne kemi arritur në dekadën e fundit në këtë rajon atë që askush nuk mund ta imagjinonte në dekada të pafundme më parë dhe nuk mund dhe nuk do të lejojmë askënd të na tërheqë prapa në të shkuarën që po e lëmë pas përgjithmonë! Së bashku! Evropa e Madhe është e ardhmja jonë e vetme.
