LEZHË– Kërcënohet me jetë ish-kryetari i Komunës së Shëngjinit Salvador Kaçaj. Ai ka deklaruar në Polici se dy persona i kanë prerë rrugën në aksin Lezhë-Milot dhe njëri prej tyre ka zbritur nga makina me një pistoletë në dorë. Në këtë moment shoferi i tij ka devijuar rrugën dhe është kthyer për në Lezhë. Në makinë me Kaçajn përveç shoferit ka qenë dhe djali i tij.
NJOFTIMI I POLICISË:
Lezhë/Informacion paraprak. Rreth orës 18:00, është paraqitur në Komisariatin e Policisë Lezhë shtetasi S. K. 56 vjeç, banues në Lezhë, dhe ka bërë kallzim se ka qenë duke lëvizur me mjetin e tij së bashku me djalin e shoferin, në aksin rrugor Lezhë-Milot, dhe konkretisht sapo kalon vendin e quajtur M+, dy automjete i kanë dalë përpara duke i bllokuar rrugën. Nga automjetet kanë zbritur dy persona të panjohur prej tij, ku njëri prej tyre është afruar me vrap në drejtim të mjetit të tij dhe dyshohet se në dorë mbante një pistoletë. Drejtuesi i mjetit ku udhëtonte shtetasi S.K., ka manovruar duke e kthyer mjetin në drejtim të Lezhës dhe kanë ardhur menjëherë në polici ku kanë bërë edhe kallzimin. Në lidhje me kallzimin e shtetasit S.K., shërbimet e Policisë kanë njoftuar menjëherë Prokurorin si dhe nën drejtimin e tij, po kryejnë të gjitha veprimet hetimore dhe procedurale me qëllimin zbardhjen e plotë të rrethanave të ngjarjes, identifikimin dhe kapjen e autorëve të dyshuar.
