TIRANË– Këshilli i Mandateve do të mblidhet të martën në orën 16:00 për të shqyrtuar kërkesën e Prokurorisë së Posaçme Kundër Korrupsionit dhe Krimit të Organizuar (SPAK) ku kërkohet arrestimi i ish-ministrit të Financave Arben Ahmetaj. Mbledhja do të zhvillohet me dyer të mbyllura për shkak të sekretit hetimor. Kjo pasi vetë SPAK kërkoi që seanca e Këshillit të Mandateve të mos jetë publike.
Në kërkesën e SPAK Ahmetaj akuzohet për tre vepra penale:
- “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, vetëm dhe në bashkëpunim, në formën e deklarimit të rremë, dhe në formën e fshehjes, parashikuar nga neni 257/a paragrafi i dytë, neni 25 i K.Penal,
- “Korrupsionit pasiv të funksionarëve të lartë shtetërorë ose të zgjedhurve vendorë” parashikuar nga neni 260 i K.Penal, 6 (gjashtë) herë;
- “Pastrimit të produkteve të veprës penale ose veprimtarisë kriminale”, në bashkëpunim, më shumë se një herë, parashikuar nga neni 287 paragrafi i dytë i K.Penal.
