KFC 1.3 ton mish pule me salmonela, AKU-ja hesht

Pas një investigimi të “Ora News” u vërtetua se “KFC” ka tregtuar për konsumatorët shqiptarë mbi 1350 kg mish pule të infektuar me bakterin e salmonelës. Salmonela është një bakter i rrezikshëm i cili shkakton infeksion në zorrë dhe sjell dhimbje të forta koke. Pas këtij denoncimi AKU ka dalë në mbrojtje të KFC, teksa as nuk e ka përmendur emrin e subjektit. Nga ana tjetër “KFC” nuk i është përgjigjur asnjë kërkese për informacion, teksa është mjaftuar me largimin e 177 kg mish nga tregu. Ndërkohë AKU nuk ka marrë asnjë masë ndaj KFC dhe nuk ka nisur një hetim se nga ku ka ardhur dhe se si është blerë ky produkt. Gjithashtu AKU nuk ka nisur asnjë inspektim mbi burimet e përdorura nga KFC për të siguruar mishin e pulës të përdorur në produktet e saj, duke mos vërtetuar nëse ky mish është përdorur dhe më herët apo jo. Konsumatorët po përballen me një rrezik të shtuar në treg, teksa AKU-ja duket se ka “mbyllur gojën” para këtij skandali.