Kim Kardashian ka pozuar me një robot “Tesla Optimus”, madje duke “shtrënguar duart” me krijimin humanoid.
Vetëm një ditë pasi ndau në rrjetet sociale takimin e saj me robotin “Optimus”, ylli i “The Kardashians” postoi një set të ri fotosh me një tjetër version të humanoidit. Në këto foto, të shoqëruara me një emoji me alien, themeluesja e SKIMS pozoi rreth dhe brenda një prototipi “Tesla Cybercab”, ngjyrë ari mat, ku një robot ngjyrë ari ishte ulur në sediljen e pasagjerit.
Në njërën prej fotove të postuara më 19 nëntor, Kim – e veshur me geta Balenciaga dhe një xhaketë të zezë të fryrë – u shfaq duke shtrënguar gishtat me robotin në një moment të veçantë. Në një tjetër, 44-vjeçarja dukej e relaksuar, e ulur në prehërin e robotit, teksa shikonte poshtë.
Kjo seri fotosh ngjalli menjëherë reagime nga fansat, të cilët nuk nguruan të bënin shaka për marrëdhëniet e saj të mëparshme romantike, duke përfshirë Kanye West dhe Pete Davidson. “Më në fund gjeti burrin e ëndrrave,” shkruante një ndjekës me humor, ndërsa një tjetër shtonte: “Pra, shpirti yt binjak qenka një robot.”
