KOSOVË- Policia e Kosovës ka konfimrmuar se katër policë, të cilët dyshohet se kishin mbetur të bllokuar për katër ditë radhazi në veri pas vendosjes së barrikadave, mbrëmë kanë arritur të dalin në stacionin policor në Leposaviq.
Në njoftimin e saj Policia thotë se oficerët që ishin në detyrë zyrtare kanë arritur të lëvizin deri në stacionin policor në Leposaviq.
“Referuar kërkesës suaj ju informojmë se, njësiti policor në përbërje prej katër zyrtarëve policor të cilët ishin me detyrë zyrtare në atë zonë, të njëjtit veçse kanë lëvizur mbrëmë për në stacionin policor Leposaviq, ku edhe qëndrojnë”, tha policia për Express.
Gjatë ditës së sotme Policia e Kosovës njoftoi se situata e sigurisë në veri të vendit është e njëjtë, ndërkohë që dy pikat kufitare Jarinje dhe Bërnjak vijojnë të jenë të mbyllura, siç dihet për shkak të vendosjes së barrikadave. Policia thotë se “në vazhdimësi e kemi bërë të ditur se Policia e Kosovës punën e bazon në vlerat e saja si profesionalizmi, përgjegjësia dhe integriteti, në kuadër të të cilave ofron siguri dhe trajton të gjithë qytetarët pa dallime”.
