LEZHË– Detaje të reja janë zbardhur në lidhje me vrasjen e biznesmenit Ardian Nikulaj mesditën e së mërkures në Shëngjin. Kanë qenë dëshmitë e dhëna nga personat e pranishëm në restorantin “Coral” në Shëngjin në pronësi të biznesmenit të ndjerë ata që kanë hedhur më shumë dritë mbi ngjarjen që tronditi Lezhën. “Tv Klan” rtaporton se banakieri i lokalit ku u vra biznesmeni Ardian Nikulaj dhe një mik i viktimës, të cilët panë të gjithë ekzekutimin e me sytë e tyre kanë treguar gjithçka dëshmuan para grupit hetimor.
Miku i Nikulajt, siç shihet edhe në këto pamje, është fare pranë viktimës dhe vrasësit, i cili në një moment i drejton edhe armën, teksa largohet me shpejtësi për nga dera. Ai ka qenë ndër të parët që është marrë në pyetje nga policia. Në dëshminë e siguruar nga Tv Klan, personi i identifikuar si Dëshmitari X, veç dinamikës, tregon disa karakteristika të fizionomisë së vrasësit.
Miku i viktimës: Isha te dera edhe isha me fytyrë nga lokali nga Ardiani, kur më erdhi nga mbrapa nga ana e djathtë e imja, një burrë i gjatë. Ai më tha veç “largohu” dhe hyri brenda në lokal dhe shkoi në drejtim të Ardianit dhe qëlloi ndaj tij. Autori ishte i gjatë, trup i mbushur, kishte një zë të trashë, por theksin nuk e mbaj mend.
Edhe banakieri i lokalit, që ishte në pronësi të viktimës, ka dhënë disa detaje mbi autorin, që mund t’i shërbejnë hetimit. Ai thotë se nga përshëndetja që bëri vrasësi, kishte kuptuar që ai fliste me dialekt nga Veriu, ose nga Shqipëria e Mesme.
Banakieri: Rreth orës 12:30-13:00, unë kam qenë në banak, dhe i ulur në tavolinën përballë ka qenë pronari Ardiani, i vetëm. Në këtë kohë ka hyrë në lokal një person mashkull, i cili ishte trup i gjatë rreth 190 cm, i shëndetshëm, i cili mbante veshur një veshje të trashë dhe një jelek pune jeshil sipër rrobave, ndërsa në kokë kishte skafandër dhe dorën e kishte në çantë, me rrip të lidhur në trup. Pasi është afruar afër banakut na ka përshëndetur duke na thënë “si e kalut” dhe është afruar tek tavolina ku ndodhej Ardiani dhe pasi ka nxjerrë armën nga çanta ka filluar të qëllojë. Nuk kam arritur ta fiksoj fytyrën e tij, pasi ndodhi gjithçka shumë shpejt. Gjithashtu nuk jam në gjendje të them se nga cila zonë mund të ketë qenë, por mendoj se nga Veriu ose Shqipëria e mesme, pasi nuk m’u duk dialekt jugor.
Ardian Nikulaj, i cili u ekzekutua me shtatë plumba në trup dhe kokë rezulton që të jetë pronar i disa bizneseve në zonën e Lezhës dhe i resortit “Coral” në bregdetin e Shëngjinit, vend ku dhe u vra. Nikulaj rezulton ta ketë ndërruar mbiemrin pasi në të shkuarën pasi më oparë ka mbajtur mbiemrin Marku. Më parë ka qënë edhe Ish-kreu i Aluznit e në të shkuarën ka qënë i dënuar për disa vepra penale. Ai rezulton i dënuar me 4 muaj burg, për prodhim dhe mbajtje të armëve luftarake dhe municioneve dhe për ‘armëmbajtje pa leje’. Ai ka qenë i dënuar në vitin 2003, dënim të cilin e ka deklaruar edhe në formularin e dekriminalizimit. Po ashtu ai ka qenë i angazhuar dhe në arenën politike në nivel qarku. Në zgjedhjet e shkuara ai ka qenë kandidat në listën e kandidatëve për deputetë në Partinë Socialdemokrate të drejtuar nga Tom Doshi. Nikulaj ishte i martuar dhe baba i katër fëmijëve.
