Koçiu: Brenda majit përfundojnë punimet në Urgjencën e QSUT-së

Ministrja e Shëndetësisë dhe Mbrojtjes Sociale, Albana Koçiu deklaroi gjatë një interviste televizive në Abc News se prej mesit të muajit prill ka nisur puna për riparimin e dëmit në rrjetin elektrik të Urgjencë s së Qendrës Spitalore Universitare “Nënë Tereza” dhe do të përfundojë brenda muajit maj.
Koçiu tha se “ishte një incident i cili ndodhi në një nga dhomat teknike të spitalit të Sëmundjeve të Brendshme, në katin -2. Për shkak të këtij defekti doli jashtë funksionimit një pjesë e sistemit elektrik në atë godinë duke bërë të pamundur që të ushtrohen disa nga shërbimet në disa nga dhomat e asaj godine”.
“ Në fakt zhurma u bë më shumë politike. Dhe të vjen keq që përdoret shëndetësia për të bërë zhurmë politike se ne kishim marrë dhe kemi marrë gjitha masat për ta ofruar shërbimin shëndetësor që ofrohej në Urgjencën e Spitalit të Sëmundjeve të Brendshme. U aktivizuan menjëherë të dy strukturat spitalore universitare në Tiranë, Qendra Universitare “Shefqet Ndroqi”, dhe Qendra Spitalore Universitare e Traumës. Sikundër për urgjencat kardiake u aktivizuan edhe dy spitale të tjera rajonale, i Shkodrës dhe Spitali Memorial Fierit”, pohoi ministrja.
Ajo shtoi se kjo situatë tregoi edhe një herë që spitalet tona janë në gjendje të përballojnë dhe të kryejnë ekzaminime të cilat deri dje do ishin të paimagjinueshme, deri dje do ta sillnin të gjithë sistemin shëndetësor, nëse do të kishte ndodhur ndonjë situatë e tillë, në kolaps.
“Sot falë investimeve që janë kryer, dhe spitali Rajonal i Shkodrës dhe Spitali Memorial I Fierit mund të shërbejnë fare mirë si urgjenca kardiake, mund të ekzaminojnë të gjithë qytetarët e veriut sikundër dhe të gjithë qytetarët e zonës së jugut në Spitalin Memorial. Ndërkohë që funksionojnë mësë miri kapacitetet në Spitalin Universitar “Shefqet Ndroqi I cili gjithashtu e përballoi fare mirë fluksin e shtuar të pacientëve të cilët u detyruan të transferoheshin për shkak të incidentit të ndodhur në këtë spital. Sot që flasim ne kemi pra një ritëm të shtuar të punës për ta sjellë në funksionim normal urgjencën në Qendrën Spitalore Universitare ”Nënë Tereza” dhe ndërkohë kemi mbështetur me kapacitete spitalin “Shefqet Ndroqi” për të kryer vetëm urgjencat kardiake të cilat ende sot nuk kryhen në QSUT ndërkohë që të gjitha shërbimet e tjera janë rikthyer dhe funksionojnë brenda QSUNT-së”, tha ministrja.