Ministrja e Shëndetësisë, Albana Koçiu, bashkë me Zv.kryeministren Belinda Balluku, kanë mbyllur ciklin e vizitave të tetorit rozë,të ndërgjegjësimit për kancerin e gjirit, me gratë dhe vajzat e kompanisë Alpetrol, në Patos.
Në mesazhin që ju është drejtuar grave dhe vajzave, ministrja Koçiu tha se kontrollet duhet të jenë të vazhdueshme, jo vetëm gjatë tetorit, sepse sëmundja mund të shfaqet në çdo kohë.
“Mamografitë lëvizëse kanë bërë rreth 800 kontrolle. Kemi shkuar te grupet vulnerabël dhe ato komunitete që e kanë të pamundur, për shkak të punëve të përditshme, të bëjnë kontrollet e domosdoshme”- ka thënë ministrja Koçiu.
Dy mamografitë lëvizëse që përgjatë tetorit kanë qenë në vende të ndryshme të Shqipërisë, kanë qenë në funksion të 130 grave dhe vajzave në kompaninë Alpetrol.
Koçiu u shpreh se “Jam e gëzuar që më ftuan të jem pjesë e këtij komuniteti grash që bëjnë një punë të lavdërueshme në një sektor jo fort të thjeshtë. Gjatë gjithë vitit ju duhet t’i ktheni sytë nga vetja, të kujdeseni për veten. Është shumë e rëndësishme, prandaj kemi dashur ta përçojmë gjatë gjithë muajit tetor mesazhin për të pasur kujdes. Gratë, nënat, motrat duhet të kujdesen për veten gjatë gjithë vitit. Nëse gruaja është mirë me shëndet edhe familja është e shëndetshme dhe gjithë komuniteti funksionon më mirë. Ndërgjegjësimi është rritur shumë dhe një lajm i mirë që na vjen nga të dhënat është që fataliteti është ulur sepse rastet e evidentimit janë rritur.”
Ndërsa Zv.kryeministrja Belinda Balluku ka theksuar se rozë duhet të jetë i gjithë viti.
“Gratë kanë përgjegjësi shumë të mëdha sepse duhet të kujdesen vetë për gjithçka, prandaj nuk na del koha të merremi me veten. Nuk e di pse kemi mendimin që ne jemi prej hekuri ndërsa burrat janë prej xhami, fëmijët prej xhami, prindërit prej xhami. Kujdesuni për veten, jo vetëm në tetor, sepse nuk pyet kanceri për muajin. Bëjini kontrollet në kohë sepse duke u kujdesur për veten kujdeseni edhe për fëmijët dhe për gjithë të tjerët.”- ka thënë zv.kryeministjra Balluku.
