Fëmijët kanë nevojë për mbrojtje të veçantë në internet dhe ata duhet të edukohen se si të shmangin rrezikun dhe si të përfitojnë maksimalisht nga përdorimi i tyre i internetit.
Në kuadër të Ditës Botërore të Fëmijëve, nën kujdesin e Ministrisë së Shëndetësisë dhe Mbrojtjes Sociale në bashkëpunim me Agjencinë Shtetërore për të Drejtat dhe Mbrojtjen e Fëmijës, Ministria e Rinisë dhe e Fëmijëve, AKCESK, Shërbimi Social Shtetëror, partnerët kombëtarë dhe ndërkombëtarë u organizua një aktivitet ndërgjegjësues për të drejtat e fëmijëve.
Ministrja e Shëndetësisë dhe Mbrojtjes Sociale, Albana Koçiu iu bashkua këtij aktiviteti të organizuar në ambientet e Qendrës TUMO te Piramida, ku fëmijët prezantuan projektet inovative që ndjekin në qendër duke dhënë mesazhe dhe për fëmijët e tjerë për të drejtat e tyre.
“Duke mësuar do të bëheni të shëndetshëm nesër, dhe duke qenë të suksesshëm nesër do të mund të merrni shumë vendime të rëndësishme që ndikojnë për gjithë jetën e komunitetit dhe gjithë jetën e shoqërisë. Dhe do ta bëni shoqërinë më të mirë dhe një vend shumë më të bukur për të jetuar”, – ishte mesazhi i Ministres Koçiu për fëmijët pjesëmarrës në këtë aktivitet ndërgjegjësues.
Ministrja e konsideroi me rëndësi ngritjen e mekanizmave për mbrojtjen e fëmijëve nga informacionet e ndryshme që shfaqen nëpërmjet internetit.
“Të ngremë mekanizmat që fëmijët të mos dëmtohen në këtë fazë të hershme nga lloj-lloj informacionesh që shfaqen. Ministria e Shëndetësisë dhe Mbrojtjes Sociale, qeveria shqiptare, janë të angazhuar për të krijuar armatën e profesionistëve siç tashmë e kemi bërë nëpërmjet krijimit të Urdhërit të Psikologut dhe punonjësit social”, ka deklaruar ministrja Koçiu.
