Qytetarë të Kosovës janë ankuar se për dënimet për kundërvajtje që po i marrin me radarë rrugorë në Shqipëri nuk po njoftohen as nga Policia e Shtetit e as nga ajo e Kosovës. Për pasojë, dënimet po u rriten me kamatë ditore prej 2 për qind. Për gjobat e papaguara, të shqiptuara pa dijeninë e tyre, qytetarëve nuk po u lejohet hyrja në shtetin shqiptar me veturën e njëjtë. Për mungesën e njoftimit e të bashkëpunimit institucional Kosovë – Shqipëri, nuk dhanë përgjigje autoritetet e asnjërës palë
Më 11 shtator tek po udhëtonte nëpër Shqipëri, Lulzim Cakolli, qytetar nga Kosova, u fotografua nga radarët rrugorë duke tejkaluar shpejtësinë e lejuar. Në aksin rrugor Laç-Thumanë, shpejtësia e lejuar ishte 90 kilometra në orë, të cilën Cakolli e tejkaloi për 37 më shumë. Këtë kundërvajtje e mati pajisja e quajtur “Poliscan”, në bazë të së cilës Cakollit iu shqiptua një gjobë prej 300 mijë lekësh që konvertohet në 304 euro e gjysmë. Por, për gjobën që mori nga shteti shqiptar, Cakolli nuk u njoftua deri para disa ditëve kur deshi të hynte në Shqipëri për kalim transit në Mal të Zi, por u kthye prapa.
Domethënë nuk e kam ditur unë që kam gjobë deri të premten kur jam nisë për të shkuar në Mal të Zi… Edhe unë kur kam hi në kufi, në Morinë, aty diku kah ora 20:30-20:45 kështu, më tha polici që ti s’mundesh me hy në kufi, nuk mund të hysh në territorin shqiptar, kerri s’mundet me hy se unë po, shkaku i dënimit”, ka thënë ai.
Policia kufitare në Morinë, Cakollit ia dha një procesverbal me të cilin i është konstatuar shkelja, e ku thuhet se pas kalimit të afatit të pagesës prej 15 ditësh, gjobës i shtohet kamatë ditore prej 2 për qind.
“Qysh më tha polici, qysh e llogariti ai dënimin, domethënë për një muaj ditë në bazë, se këto dënimet në Shqipëri qenkan me kamatë ditore, domethënë mua më paska mbërritur gjoba diku afër 500 eurove, në bazë të fjalëve të policit. Me u njoftua nuk jam njoftuar kurrgjë hiç”, është shprehur Cakolli.
Cakolli nuk e konteston gjobën e shqiptuar, por shprehet i indinjuar me mungesën e bashkëpunimit Shqipëri-Kosovë, që të njoftohen qytetarët që gjobiten në këtë lloj mënyre.
“Polici gojarisht tha me blic je dënuar, faktikisht s’kanë mundur të ta dërgojnë gjobën. Ndoshta kish me qenë gjë normale me u pasë dënuar në Serbi. Po të dënohesh në Shqipëri e mos të të vijë gjoba në Kosovë, ose mos të njoftohesh në kufi në dalje, pak e keqe. Policia e Shqipërisë edhe Kosova ma merr mendja mua, i kanë marrëdhëniet, është dashtë me i pasë të mira, po shpresojmë ne”, shton ai.
Se cili është bashkëpunimi i shtetit shqiptar me Kosovën dhe cilat janë arsyet që Cakolli nuk është njoftuar për gjobën, nuk u përgjigjën as nga Ministria e Brendshme e Shqipërisë as nga Policia e Shtetit. Njësoj përgjigje nuk dhanë as në MPB-në e Policinë e Kosovës. Cakolli thotë se do të ankohet në Drejtorinë e Policisë Rrugore në Tiranë, pasi thotë se nga papërgjegjësia e tyre për ta njoftuar, është dëmtuar me rritje të dënimit prej qindra eurosh.
