KOSOVË– Këtë të enjte në Kuvendin e Kosovës janë treguar gjashtë kushtet për formimin e Asociacionit të komunave me shumicë serbe nga Kryeministri i Kosovës, Albin Kurti. Kushti i parë sipas tij është që të jetë në përputhje me Kushtetutën e Kosovës dhe ligjet që janë në fuqi. Kurti ka thënë se nuk mund të ketë Asociacion monoetnik.
“Asociacioni të jetë në përputhje me Kushtetutën e Kosovës dhe ligjet në fuqi. Nuk mund të jetë Asociacion monoetnik dhe duhet t’i shërbejë vetëm bashkëpunimin horizontal me komunat”, ka thënë ai.
Kryeministri i Kosovës ka shtuar më tej se kusht tjetër që para formimit të Asociacionit, është që të shuhen strukturat ilegale të Serbisë edhe bëhet dorëzimi i armëve ilegale.
6 KUSHTET:
1. Asociacioni duhet të jetë në përputhje me Kushtetën dhe ligjet në fuqi në Republikën e Kosovës.
2. Asociacioni nuk mund të jetë monoetnik, duhet të ndërrojë emrin, nuk mund të ketë/bartë asnjë pushtet publik (apo ekzekutiv) dhe duhet t’i shërbejë vetëm bashkëpunimit horizontal të komunave sipas Kushtetutës dhe ligjit per vetëqeverisje lokale (kreu 5).
3. Asociacioni është pjesë e marrëveshjes finale dhe zbatohet pas njohjes reciproke. Dhe, në ndërlidhje me këtë të fundit, vetëm pasi Serbia t’i ketë pranuar parimet e Kartës së OKB-së në raportet e saj ndërshtetërore me Republikën e Kosovës.
4. Para vendosjes së Asociacionit, strukturat ilegale të Serbisë në veri të Kosovës shuhen dhe bëhet dorëzimi i të gjitha armëve ilegale.
5. Të drejtat e pakicave kombëtare dhe mekanizmat mbrojtës përkatës duhet ta ngërthejnë parimin e reciprocitetit ndërmjet dy shteteve respektive, si dhe të marrin parasysh standardet dhe modelet evropiane.
6. Presidenti i Serbisë i tërheq letrat e dërguara te pesë (dhe tek të tjera) shtetet anëtare të BE-së për mospranimin e aplikimit të Republikës së Kosovës për anëtarësim në BE (që paraqet edhe shkelje të po asaj marrëveshjeje Thaçi-Daçiq të 19 prillit 2013).
