Komisioni Qendror i Zgjedhjeve do të mblidhet të martën në mesditë për të shqyrtuar materialin hetimor të dërguar nga Zyra e Dekriminalizimit në Prokurorinë e Përgjithshme për Kryetarin e Bashkisë së Kuçovës, Kreshnik Hajdari, i cili pas verifikimeve rezulton i dënuar në Greqi, Janinë.
KQZ ka informuar publikun se ka marrë përgjigje nga Prokuroria e Përgjithshme lidhur me hetimin administrativë të deklaratës së dekriminalizimit të Kryebashkiakut Hajdari nga Prokuroria e Përgjithshme. Sipas verifikimeve të kryera nga Prokuroria e Përgjithshme, rezulton se Hajdari edhe pse nuk ka deklaruar se ishte në dijeni të ndonjë dënimi apo procesi gjyqësorë, kryebashkiaku rezulton të jetë dënuar penalisht në vitin 1999 për akuzën e “Hyrjes në territorin Grek në mënyrë të paligjshme”. Hajdari për këtë akuzë rezulton të jetë i dënuar me 4 muaj burg të konvertuar në gjobë në vlerën e 1 500 dhramive nga Gjykata e Janinës. Madje sipas shkresës së publikuar nga prokuroria, rezulton që Hajdari të ketë qenë i pranishëm në sallë gjatë dhënies së vendimit.
Në zgjedhjet e 14 majit 2023, Kreshnik Hajdari i Partisë Socialiste fitoi bashkinë e Kuçovës me mbi 600 diferencë ndaj Lefter Maliqit të Koalicioni “Bashkë Fitojmë”, teksa i treti u rendit Ilirjan Koxhaj i Partisë Demokratike.
Më herët, Lefter Maliqi, kundërshtar i Hajdarit në zgjedhjet 14-majit, e ka kallëzuar penalisht kryebashkiakun e Kuçovës në Prokurorinë e Posaçme Kundër Korrupsionit dhe Krimit të Organizuar, ndërsa ndaj tij SPAK ka nisur hetim për akuzën e “Falsifikimit të formularit të vetë-deklarimit”.
