Ashtu si në 14 maj, Komisioni Qendror i Zgjedhjeve ka regjistruar për të marrë pjesë në zgjedhjet e Kukësit, Partinë Demokratike zyrtare të Lulzim Bashës, duke rrëzuar kërkesën e grupimit të rithemelimit të Sali Berishës për t’u regjistruar ata me logon e PD-së.
Komisioneri Shtetëror i Zgjedhjeve Ilirjan Celibashi tha se “sipas një shkrese të gjykatës, Lulzim Basha është kryetar i PD-së”.
Debatet se kujt i përket vula e Partisë Demokratike mes Lulzim Bashës dhe Sali Berishë u zhvendosën edhe një herë në Komisionin Qendror të Zgjedhjeve.
Edhe Berisha edhe Basha kërkuan nga Komisioneri Shtetëror i Zgjedhjeve Ilirjan Celibashi regjistrimin e PD së tyre në zgjedhjet e 24 Shtatorit, për bashkinë Kukës.
Të dy përfaqësuesit ligjorë të Bashës e Berishës dhanë argumentet e tyre pse KQZ duhet të regjistrojë PD në zgjedhje.
Në fund, Ilirjan Celibashi vendosi se PD në këtë moment e përfaqëson Lulzim Basha, dhe ai duhet të regjistrohet në zgjedhje.
Tanimë grupimi i Rithemelimit i përfaqësuar nga Sali Berisha pritet të apelojë vendimin e KQZ në Komisionin e Ankesave dhe Sanksioneve ku do të kërkojnë që kandidati i tyre Emri Vata të regjistrohet nën logon e PD-së.
/ Newszone
