TIRANË–Kreu i Prokurorisë së Posaçme Kundër Korrupsionit dhe Krimit të Organizuar (SPAK) ka raportuar këtë të hënë në Kuvend mbi ecurinë e institucionit që drejton për vitin 2022. Sipas tij problem për SPAK janë çështjet e mbartura. Po ashtu probleme sipas Dumanit janë hasur dhe në proceset e ekstradimeve ndërkohë kërkoi paga më të larta për ekspertët e provave dixhitale.
Altin Dumani: Kemi vuajtur mungesën e infrastrukturës. Kemi punuar 3-4 prokurorë në një zyrë. Edhe administrata, por kjo problematikë tashmë mund të konsiderohet e zgjidhur, pasi na është vënë në funksion një tjetër godinë. Mungesa e ekstradimit të eksponentëve të krimit, kryesisht nga Emiratet Arabe, që ka vënë në vështirësi. Procedurat e ekstradimit vazhdojnë, por s’kemi asnjë të ekstraduar nga Emiratet e Bashkuara Arabe. Statusi financiar jo i kënaqshëm i ekspertëve të provave digjitale. Ne kemi një laborator, por trajtimi i tyre financiar lë për të dëshiruar. Kemi frikë se mund të na largohen.
