Kryeministri grek Kyriakos Mitsotakis është takuar në Jeruzalem me homologuan Benjamin Netanyahu, në kuadër të vizitës së tij në Izrael.
Pas takimit, Mitsotakis ka përqafuar Netanyahun, ndërsa i ka shprehur se mbështetja e Greqisë ndaj Izraelit do të vazhdojë.
“Vij këtu jo vetëm si një aleat, por si një mik i vërtetë. Ajo që ndodhi ishte vërtet e tmerrshme. Që në momentin e parë, Greqia mbrojti dhe mbështeti të drejtën e Izraelit për vetëmbrojtje, sipas ligjit ndërkombëtar. Ne bëmë një dallim shumë të qartë midis Hamasit dhe popullit palestinez. Ne do të vazhdojmë t’ju mbështesim dhe shpresojmë se çfarëdo që të ndodhë duhet të ndodhë të jetë pa kosto të mëdha humanitare. Ju mund të mbështeteni në suportin tonë, ndihmën tonë”, tha ai.
Kyriakos Mitsotakis nënvizoi të drejtën e Izraelit për vetëmbrojtje sipas ligjit ndërkombëtar dhe përsëriti nevojën për të mbrojtur civilët, për të liruar izraelitët e mbajtur peng nga Hamasi dhe për të shmangur një krizë humanitare.
Kryeministri grek mbërriti herët në mëngjes në Izrael, duke konfirmuar informacionet që qarkullonin që prej të dielës pasdite se sot do të bëjë udhëtimin që nuk kishte ndodhur një javë më parë.
Në takim morën pjesë ministri i Jashtëm grek, Giorgos Gerapetritis, ministri i shtetit Stavros Papastavrou, drejtoresha e zyrës diplomatike të Kryeministrit, Anna-Maria-Heleni Boura dhe ambasadori grek në Izrael, Kyriakos Loukakis.
