Kryeministrja serbe Brnabiç sot viziton tre qytete në veriun e Kosovës

 Kryeministrja e Serbisë, Ana Brnabiç do të zhvillojë ditën e sotme një vizitë në Veri të Kosovës.

Në vizitën e parë që kur u zgjodh kryeministre, Brnabiç, vjen edhe me lejen e lëshuar nga Ministria e Punëve të Jashtme.

Mediat serbe kanë zbuluar edhe agjenda e vizitës së saj dhe në plan nuk është vetëm vizita në Mitrovicë të Veriut, por edhe në qytete të tjera.

“Gjatë vizitës, Brnabiç do të vizitojë Mitrovicën, Zveçanin dhe Leposaviqin”, thuhet në njoftimin e qeverisë serbe.

Bashkë me të, do jenë edhe drejtori i të ashtuquajturës Zyra për Kosovën në Qeverinë e Serbisë, Petar Petkoviç dhe drejtori i Zyrës për IT dhe e Qeverisje Mihailo Jovanoviç.

Ky i fundit vjen, pasi Brnabiç do të vizitojë qendrën e parë multimediale në veri të Kosovës dhe të ashtuquajtur Akademinë në Mitrovicë, pas së cilës është planifikuar një vizitë në manastirin e Banjskës në komunën e Zveçanit.

Më pas, në komunën e Leposaviqit, kryeministrja serbe do të vizitojë familje serbe që qeveria serbe u ka ndërtuar shtëpi.

Kjo është vizita e parë e Brnabiç qysh nga viti 2017, kur kishte vizituar Kosovën në cilësinë e njëjtë.

Kryeministri i Kosovës, Albin Kurti, të cilin Brnabiç nuk e njeh për homolog, e ka komentuar vizitën e saj, por vetëm për të thënë se pret që ajo “të mos bëjë deklarata përçarëse, si i ashtuquajturi drejtor për Kosovën në Qeverinë e Serbisë, Petar Petkoviç”.