DIBËR– Dy persona janë vënë nën hetim këtë të premte nga policia e Dibrës nën akuzën e kontrabandës së mallrave. Raportohen se të dy u kapën me një makinë kamionçinë dke transportuar bagëti të imëta, të cilat ishin pa numër matrikullimi si dhe pa dokument shoqërues.
NJOFTIMI I POLICISË:
Dibër Goditet një tjetër rast i dyshuar i kontrabandës, procedohen penalisht 2 shtetas. Specialistët e Seksionit për Hetimin e Krimeve Ekonomiko-Financiare të DVP Dibër, në bashkëpunim me Shërbimet e Komisariatit të Policisë Kufitare Bllatë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës me mallra, referuan materialet në Prokurori dhe nisi procedimi penal në gjendje të lirë për shtetasit M.B., 54 vjeç; F.Z., 54 vjeç, banues në Dibër. Shtetasit e lartëpërmendur janë kapur në flagrancë, duke transportuar me një automjet tip kamionçinë bagëti të imëta, për të cilat nuk kishin numër matrikullimi dhe as dokument shoqërues për ta. Materialet i kaluan Prokurorisë për veprime të mëtejshme.
