Përmes një reagimi “Top Channel”, të nesërmen e intervistës së Xhafës, konkretisht redaksia e televizionit u përgjigj se i takon ish-ministrit të pastrohej nga e shkuara e tij e nxjerrë në pah në Inside Story: “Dalja publike përkon me ambicien e re politike, të cilën Xhafaj e ka shpalosur kohët e fundit nëpërmjet një komisioni të posaçëm anti-korrupsion, që brenda radhëve të socialistëve shihet si një rikthim i ish-Ministrit të Brendshëm. E për të arritur këtë, Xhafaj duhet të pastrojë të shkuarën e tij, ku Inside Story ka një rol të pashmangshëm. Dokumentari, për të cilën Xhafaj i referohet me zhargonin e gjobvënies, reflekton një mllef të mbartur, një argument shterp, një akuzë penale, përballë dhjetëra fakteve të publikuara në dokumentarin e vitit 2018″, thuhej në deklaratën e televizionit.
Por kjo situatë nxjerr në pah dinamika të rrezikshme, ku figura politike përpiqen të kontrollojnë narrativat që ndihmojnë në forcimin e imazhit të tyre. Në mes të kësaj përplasje, lindin disa pyetje të rëndësishme: A është Top Channel një platformë e pavarur informimi, apo një vegël e politikës që shërben për të mbuluar skandale? ; A është Balluku një zë i fuqishëm që dikton linjën editoriale të Top Channel, apo është ajo thjesht një pjesë e skenës së një teatri politik më të madh?
Megjithatë kjo përplasje e ashpër sjell në vëmendje çështjen e pavarësisë së mediave në Shqipëri dhe rolin e tyre në formësimin e narrativave publike. Ndërsa akuzat e ndërsjellta heqin maskat nga një realitet më i errët, intriga e kësaj historie vetëm sa intensifikohet, duke lënë publiku në pritje të zbardhjes së të vërtetës pas këtyre akuzave të rënda, të cilat Belinda Balluku si aktore kryesore duhet t’i sqarojë.
Ja çfarë deklaroi Xhafaj
Deputeti i PS, Fatmir Xhafaj, i pyetur nga moderatori Blendi Fevziu për investigimin e vitit 2017-2018, u përgjigj: “Është makabre e gjitha kjo. Është e turpshme. Në 2017- 2018 është bërë një emision në një televizion kombëtar, gjobvënës, që njihet dhe është akuzuar publikisht për gjobëvënie, dhe është bërë emision për mua pasi kam ikur nga Ministër i Brendshëm, produkt i aleancës së plehrave, midis krimit, biznesit, grupeve të biznesit në këtë fushë dhe medias së kriminalizuar, dhe është ndërtuar një fabul.
Kjo është si puna e asaj, pse nuk bie kambana në fshat? Sepse nuk ka fare kambanë. Unë dhe ky person që është folur kaq shumë, që më kanë akuzuar, ky personi që i thonë kunati im, , ky njeriu ka dy gjëra të përbashkëta me mua, është shqiptar dhe ngrohemi nën një diell, zero njohje. Hodhe gjithë këtë baltë, ta pastrova, bëj një emision tjetër, të vij prapë unë dhe më thuaj që i verifikove. Nuk e di kush është ky njeri, di vetëm emrin dhe kompaninë, nuk e kam idenë, i kam pyetur të gjithë familjarët e mi, nuk kanë asnjë lidhje.”
Çfarë deklaroi Ahmetaj për Ballukun?
Ish-krahu i djathtë i Edi Ramës, Arben Ahmetaj ngre pikëpyetje se pse SPAK nuk merr nën hetim Belinda Ballukun. Në një intervistë televizive, duke ju drejtuar SPAK-ut, Ahmetaj u shpreh disa muaj më parë se paratë nuk po gjenden dhe pyet se nëse Belinda Balluku, e cila kishte për detyrë ta monitorojë inceneratorin që nga 2019-a, ka dhënë ndonjë raport. Më tej ai shprehet se nga burime të sigurta të tij, Belinda Balluku është drejtoresha editoriale e “Top Channel”. “A ka raport Belinda Balluku për monitorimin e inceneratorit qe nga 2019? Pse Dumani nuk e shikon këtë? SPAK nuk e sheh pa e thënë Rama.
Drejtoreshe editoriale e Top Channel është Balluku, e kam nga burime te brendshme”, deklaron Ahmetaj. Gjatë intervistës në Syri tv, Ahmetaj tha se Top Channel si një përfitues i madh i parave të aferës së inceneratorëve, tashmë është kthyer në “instrument” shërbyes për Edi Ramën. “Arsyeja është se është kapur drejtësia. Nuk flet media, media komandohet, bjerini Ben Ahmetajt. Ma kanë pranuar vetë. TCH një televizion i dashur, i një burri mik i shtrenjtë i imi, ndjesë pastë, arrin e më godet mua me urdhër të kryeministrit për arsye, që do i themi tek e treta me data, me emra dhe persona. Shet dinjitetin TCH për çfarë.
Top Channel aspirimi i lirisë së medias në Shqipëri, të kthehet në një instrument të Ramës. Çfarë fike kanë? Frikën e financave? Frikën e pastrimit të parave? Frikën e pronësisë? S’kanë çfarë frike të kenë është djersa e babait të tyre të ndierë. Po flasim si Top Channel, ka qenë influenca e parave të inceneratorëve që tani ka dalë me fakte dhe orientimi politik. Pse nuk hetohet ku janë paratë, ku janë 80 milionë eurot?”, nënvizoi Ahmetaj.
