TIRANË– Ish-shefja e kabinetit të ish-ministrit Arben Ahmetaj, Alda Klosi është marrë nën hetim nga Policia. Në shtëpinë e Klosit Rozeta Dobi dhe djali i saj vodhën më shumë se 500 mijë euro. Policia ka shtrirë hetimet për të zbuluar se nga vinin këto të ardhura.
Vjedhja ka ndodhur më datë 15 dhjetor kur në shtëpi nuk ndodhej askush. Rozeta Dobi punonte si pastruese në shtëpinë e ish-zyrtares së lartë në Ministrinë e Financave Alda Klosi. Paratë janë vjedhur në kohë të ndryshme. Pasi kishin kryer grabitjen e fundit Dobi dhe i biri Havier Dobi e kthyen shtëpinë “përmbys” për ta bërë të dukej si grabitje. Pas kontrollit në shtëpi atyre iu gjetën dhe 404 mijë dollarë të tjerë, mijëra euro dhe bizhuteri, të cilat ishin fshehur në tubin e aspirimit. Rozeta e Havier Dobi e pranuan krimin para uniformave blu. Havieri me paratë e vjedhura kishte blerë makina luksi, të cilat i ekspozonte në rrjetet sociale.
