KUKËS- Moti i keq i shoqëruar sot nga reshje të dendura shiu dhe stuhi kanë shkaktuar probleme edhe në qarkun Kukës. Mësohet se në disa rrugë ka rënie inertesh dhe gurësh të cilat kanë sjellë bllokimin e disa fshatrave duke bërë të pamundur qarkullimin e banorëve.
Konkretisht, fshatrat të cilat janë bllokuar janë: Nimçë, Carnalevë, Pakisht, Zapot, Xhaferraj, Tërshenë, Çajë, Shkinak etj. Nga ana tjetër, në rrugët nacionale qarkullimi i mjeteve vijon pa probleme, ndërsa subjektet kontraktore po punojnë për pastrimin dhe mbajtjen funksionale të rrugëve të bllokuara. Sakaq, rezervuarët po mbahen nën monitorim të vazhdueshëm në të gjithë qarkun Kukës.
Aktualisht, reshjet e shiut po bien me intensitet të lartë duke rritur edhe prurjet në hidrocentralet e vegjël të Kukësit, prurje të cilat po rrisin me shpejtësi edhe nivelin e ujëmbledhësit më të madh hidrik në vend, atë të Fierzës.
