E shtuna është një ditë heshtje zgjedhore në Kukës, një ditë para se qytetarët e bashkisë në veri të vendit ti drejtohen kutive për të zgjedhur kryetarin e ri të Bashkisë. Në qytet, gjithçka është gati për procesin e votimit që do të zhvillohet ditën e diel.
Në total janë 45 mijë e 946 qytetarë me të drejtë vote, që do të votojnë në 74 qendra votimi. Dy kandidatët në garë janë Albert Halilaj për Partinë Socialiste dhe Emri Vata nga koalicioni “Bashkë Fitojmë”. Kandidatët janë të renditur me numrat 1 për Halilaj dhe 2 për Vatën në fletën e votimit.
Çudia e procesit janë komisionerët ku grupi i Lulzim Bashës edhe pse nuk ka një kandidat, Komisioni Qendror i Zgjedhjeve i dha 146 komisionerë pasi u regjistrua si subjekt zgjedhor për zgjedhjet e të dielës.
Ndërsa “Bashkë Fitojmë” ka vetëm 1 anëtar në grupet e KZAZ-ve dhe 73 komisionerë në total. Partia Socialiste ka edhe numrin më të madh të komisionerëve në 292. Në total, janë 518 komisionerë që do të administrojnë procesin zgjedhor.
Zgjedhjet në Kukës vijnë 2 muaj pas arrestit dhe dorëheqjes së Safet Gjicit, i cili drejtoi bashkinë e Kukësit për 4 vite.
Gjici u largua pas publikimit të një video-skandali ku ai shfaqej duke kryer marrëdhënie seksuale në zyrën e tij me një grua të cilës i kishte premtuar një tender për qentë në bashkinë e Kukësit.
/ Newszone
