TIRANË– Sekretari i Përgjithshëm i Partisë Demokratike Flamur Noka duke komentuar arrestimin e ish-agjentit të FBI-së Charles McGonigal në Shtetet e Bashkuara të Amarikës për shkelje të sanksioneve ndaj Rusisësë dhe ku në dosjen voluminoze të drejtësisë amerikane përmendet dhe kreu i qeverisë shqiptare Edi Rama për lidhjet e tij me McGonigal dhe një pagesë prej 225 mijë dollarësh dhënë nga persona të tretë. Sipas Partisë Demokratike ato para janë dhënë në mënyrë korruptive dhe sipas Nokës këtë e vërteton fakti se nuk janë dhënë me bankë por dorazi. Duke folur në studion e “Kjo Javë” numri dy i selisë blu tha se nuk mund të pranohet një kryeministër i korruptuar që i “fut thikën pas shpine Amerikës”. Sa i përket tensioneve të fundit në seancën plenare të së enjtes Noka tha se nuk do të ketë qetësi nëse fjala e opozitës nuk resapektohet. Kryeparlamentaren e quajti kukulla e Ramës.
Flamur Noka: Ka kohë që në Shqipëri Parlamenti nuk përfaqëson atë që duhet të përfaqësojë në demokraci normale. Është kthyer në noter të babëzisë së Ramës. Ka të paktën 2 vite që opozitës bëhet gjithçka t’i ndërpritet zëri e të mos i jepet e drejta për të mbrojtur problematikat, për çka jemi zgjedhur. Kur deputetët e opozitës konsiderohen armiq dhe vetëm disa kokrra miq, ky është monizëm që ka kohë që ka nisur të shtrijë tentakulat në çdo pjesë, ka kapur në kthetra parlamentarizmin si në Rusi. Kemi bërë disa kërkesa si opozitë, komision hetimor për udhëtimet me Charterat e Ramës dhe rezolutë për të dënuar krimet serbe në Kosovë. Kërkesa që duhet të ishin trajtuar po janë hedhur në kosh. Ndodhi megaskandali ndërkombëtar, opinioni amerikan i shokuar, mediat botërore të alarmuara, në Shqipëri vijohet të trajtohej në Parlament sikur nuk kishte ndodhur asgjë. Një megaskandal ku gjithë bota ziente, kërkuam të ndryshonte axhenda sepse kryeministri ynë ishte kapur në flagrancë duke korruptuar zyrtarin e agjencisë më të fuqishme të botës për sigurinë. Shpresuam që duhet të kishte alarm dhe duhej kthyer në mega axhendën e çdo Parlamenti. Me urdhër, kukulla barbi që drejton seancat, mori urdhër që kjo të mos bëhej dhe një seancë që do zgjaste 24 orë zgjati 24 minuta. Parlamenti po s’ju kthyer normalitetit e po nuk u respektua opozita, fake parlament nuk mund të ketë. Rama e kukulla e tij nuk mund të përjashtojë gjithë popullin opozitar, por bëjnë veprime të neveritshme. Pas këtij megaskandali që tronditi botën dhe shokoi agjencitë e sigurisë të SHBA, Shqipëria s’mund të pranojë të drejtohet nga një hajdut e një korruptues
