TIRANË– Vendimi i sotëm i Enkelejd Alibeajt për të përjashtuar zyrtarisht nga Grupi Parlamentar katër deputetët Oerd Bylykbashin, Tritan Shehun, Agron Shehajn dhe Belind Këlliçin trazoi dhe njëherë ujërat e politikës në kampin blu që tashmë nën drejtimin e Berishës po përgatitet për zgjedhjet vendore të 14 majit.
Por vendimi i sotëm i Enkelejd Alibeajt dhe njerëzve që e mbështesin për të përjashtuar kolegët, të katërt zëra të fortë në parlament dhe jashtë tij mund të jetë nul. Burime për “Newszone” bëjnë me dije se shumica dërrmuese e deputetëve ka firmosur shkakrkimin e Enkelejd Alibeajt si kryetar grupi dhe emërimin në këtë detyrë të Ervin Salianjin.
Mësohet se vendimi i sotëm i marrë nxitimthi nga Alibeaj ka ardhur pas zërave afër tij për këtë lëvizje të kolegëve. Ligjvënisit e pranishëm nuk janë bërë të ditur pasi dhe në njoftimin e bërë nga Alibeaj mungoi shkresa zyrtare e firmosur që do i dorëzohet dhe Kuvendit, i cili në seancën e parë për këtë sesion të ri parlamemtar do i “nxjerrë” jashtë liste Shehaj, Këlliçin, Shehun dhe Bylykbashin.
Të gjithë veprimet e kryera nga Alibeaj së fundmi që erdhën deri në këtë vendim lenë të dyshojnë se shkarkimi i kolegëve erdhi dhe për të prishur balancat e numrave në grup që do të sillnin dhe shkarkimin e tij. Kjo lëvizje shton edhe më tej tensionet në kampin blu në prag të zgjedhjeve vendore të 14 majit.
Në njoftimin e bërë publik nga Alibeaj dhe mbështetësit e tij thuhet se përjashtimi i Oerd Bylykbashit, Tritan Shehut, Agron Shehajt dhe Belind Këlliçit ka ardhur pasi këta të fundit nuk kanë reflektuar në lidhje me protestën e 8 dhjetorit në selinë qëndrore që solli dhe përplasjen e demokratëve.
Ervin Salianji është nga deputetët më aktivë në parlament dhe jo vetëm. Çështjet e ngritura prej tij kanë nxitur debat dhe tensione me mazhorancën. Ndërkohë në lidhje me largimin e deputetëve ka reaguar ashpër dhe deputetja demokrate e Elbasanit Flutura Açka, e cila në një postim në Facebook e quan marrëzi veprimin e Enkelejd Alibeajt, pozita e të cilit në grupin parlamentar mbetet e ende e paqartë.
Në njoftimin e bërë publik për mediat grupi i deputetëve që mbështesin Enkelejd Alibeajn kanë përjashtuar zyrtarisht nga Grupi Parlamentar katër kolegët e tyre, Oerd Bylykbashin, Tritan Shehun, Agron Shehajn dhe Belind Këlliçin. Sipas tyre ditën e sotme është mbushur afati prej 1 viti që u ishte lënë në dispozicion për të reflektuar në lidhje me ato që grupi i Alibejat i cilëson si akte dhune të frymëzuara nga Sali Berisha më 8 dhjetor në selinë e PD. 8 dhjetori ishte një nga ditët më të vështira për demokratët dhe Partinë Demokratike. Sali Berisha, i cili kishte nisur aksionin e tij politik për të rrëzuar nga posti i kryetarit Lulzim Bashën në ditën e rinisë mblodhi demokratët në selinë qëndrore për të marrë në dorëzim selinë e partisë, e cila ishte blinduar nga Lulzim Basha me dyer prej hekuri gjë që irritoi demokratët të cilët i shemben me ç’kishin në dorë. Në këtë moment ndërhyri policia dhe shpërndau turmën. Dy ditë pas ngjarjes, disa deputetë (përfshirë Berishën) u përjashtuan menjëherë, ndërsa katër deputetëve të përjashtuar sot iu kërkua distancim publik nga ngjarja./Newszone
