TIRANË– Ish-anëtari i Këshillit Kombëtar të Partisë Demokratike, Edvin Kulluri tregon emrin e personazhit të njohur që i ka lënë mesazhin “seen” dhe nuk i ka kthyer përgjigje.
“Berisha në vitin 2017 kur i kam shkruar që të vepronte urgjentisht për situatën në Partinë Demokratike dhe nuk ktheu përgjigje. Jam i sigurt që e ka aprovuar tekstin por nuk donte të përfshihej dhe ky është çmimi i rëndë që po paguan vetë, çështjen, jo mesazhin tim. Berisha është politikani më inteligjent që kam njohur dhe shpesh herë më pak i mençur”, tha ai.
Në emisionin “Stay Tuned” në MCN Tv me Valbona Mhillin, ai e cilësoi Edi Ramën inteligjent, ndonëse shtoi se nuk është në nivelin e Sali Berishës.
“Është më i përmbajtur, më finok nga Rama më llogaritar i mirë, më intrigant, në kuptimin e pushtetit. Por ka probleme të mëdha në formimin kulturor politik dhe institucional, shumë cinik shpesh e kalon masën e cinizmit, po inteligjent është. Ilir Meta nuk u rrit dot kurrë aq sa mendonte se ishte. Mbeti në mes, i parealizuar jo në kuptimin e karrierës dhe posteve, por të fuqisë politike. Ka diçka që e pengon Ilir Metën të kalojë në nivelin më të lartë”, tha Kulluri.
Për Fatos Nanon, tha se është inteligjent dhe tolerant nga natyra, gjë që e cilësoi cilësi shumë të rrallë në politikë.
“Është tolerant nga natyra gjë që është shumë e rrallë nga natyra, por edhe fëmijë. Përtac i këndshëm, por edhe institucional, këtë e ka pasur cilësi shumë të mirë. Lulzim Basha, është një zhgënjim shumë i madh jo për mua, por për shumë njerëz. Veliaj është një Lulzim pak më i aftë se Basha, por në tërësinë e vetë është qenie zhgënjyese, nuk do mbahet mend për ndonjë gjë të posaçme, vizatim i Edi Ramës”, shtoi Kulluri.
