SHKODËR– Një 41-vjeçar i identifikuar me inicialet Dh.T është vënë në prangat e Policisë së Shkodrës këtë të mërkurë pasi kishte kultivuar bimë narkotike të llojit kanabis në banesë. Në cilësinë e provës materiale u sekuestruan 35 bimë kanabis, të cilat u asgjesuan me anë të djegies. Ndërsa dy persona të tjerë janë vënë nën hetim për prishje të qetësisë publike dhe prerje e paligjshme e drurëve.
NJOFTIMI I POLICISË:
Shkodër Goditet një tjetër rast i kultivimit të bimëve narkotike, vihet në pranga autori i dyshuar. Specialistët për Hetimin e Krimeve të Komisariatit të Policisë Vau i Dejës kanë vënë në pranga shtetasin Dh. T., 41 vjeç, banues në fshatin Trush, Shkodër, pasi gjatë kontrollit të territorit në fshatin Tush i Poshtëm, Vau i Dejës, në pronën e këtij shtetasi, janë gjetur të mbjella 35 bimë të dyshuara narkotike cannabis sativa. Disa bimë u sekuestuan si provë materiale, ndërsa pjesa tjetër u asgjësua me anë të djegies.
Specialistët për Hetimin e Krimeve të Komisariatit të Policisë Shkodër referuan materialet në Prokurori dhe nisi procedimi në gjendje të lirë për shtetasin J. R., 40 vjeç, banues në lagjen “Skënderbeg”, Shkodër, pasi dyshohet se ditën e djeshme, ka shkaktuar prishje të qetësisë publike, duke qëlluar në ajër, me armë imituese, e cila u gjet më pas nga shërbimet e Policisë dhe u sekuestrua në cilësinë e provës materiale.
Gjithashtu, nga specialistët për Hetimin e Krimeve të Komisariatit të Policisë Malësi e Madhe u referuan materialet në Prokurori dhe nisi procedimi në gjendje të lirë për shtetasin A. S., 25 vjeç, banues në fshatin Grudë e Re, Shkodër, pasi është kapur duke transportuar me kamion, dru për zjarr, të prera në mënyrë të paligjshme. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
