Tirana do të gjallërohet me tingujt jazz dhe blues më 8, 9 dhe 10 korrik, me rikthimin e një prej ngjarjeve më të veçanta kulturore të verës: Gjon Mili Jazz & Blues Festival, që këtë vit zhvillon edicionin e tij të katërt pranë Instalacionit “Reja – The Cloud”.
Për tri net radhazi, publiku do të ketë mundësinë të shijojë falas performancat e 6 formacioneve muzikore shqiptare dhe të huaja, me pjesëmarrjen e rreth 40 muzikantëve profesionistë dhe të rinj, në një atmosferë që bashkon talentin, kulturën dhe trashëgiminë. Rikthehet si moderator i festivalit, me gjithë humorin dhe simpatinë e tij, Stenaldo Mëhilli.
Në thelb të këtij festivali është figura e Gjon Milit, fotografit shqiptar që jetoi dhe krijoi në SHBA, i cili dokumentoi dhe promovoi me objektivin e tij muzikën jazz në vitet e saj më të arta. Ky festival synon të sjellë këtë trashëgimi artistike në kujtesën kolektive shqiptare, si pjesë e identitetit tonë kulturor dhe burim frymëzimi për brezat e rinj. Festivali është gjithashtu, edhe një mundësi unike për të përjetuar nga afër magjinë e jazz-it nën qiellin e Tiranës dhe për të njohur e promovuar talentet e reja shqiptare në një skenë ndërkombëtare. Tirana edhe një herë dëshmon se është një qendër e gjallë e artit dhe kulturës bashkëkohore.
Ky edicion është organizuar nga RIAS, në bashkëpunim me Kongresin Rinor Kombëtar, Muzikën e të Rinjve dhe Universitetin e Arteve, me mbështetje nga Ministria e Kulturës, Ekonomisë dhe Inovacionit, Agjencia Kombëtare e Diasporës, Ambasada Austriake, Instituti Italian i Kulturës, etj dhe partnerë të tjerë institucionalë e diplomatikë.
Programi i koncerteve:
📅 E martë, 8 korrik:
🕗 20:00 – BLUE BIRD BAND (Shqipëri)
🕘 21:00 – HARD MACES TRIO (Itali)
📅 E mërkurë, 9 korrik:
🕗 20:00 – ALFRED RUCI AND FRIENDS (Shqipëri – Diaspora)
🕘 21:00 – HAEZZ (Austri)
📅 E enjte, 10 korrik:
🕗 20:00 – UART COMBO & YOUNG TALENTS (Universiteti i Arteve – Shqipëri)
🕘 21:00 – FULVIO SIGURTÀ & ANDI KONGO TRIO (Itali – Shqipëri)
• SWING STRINGS ENSEMBLE, me drejtim nga Pjetër Guralumi
