TIRANË– Mijëra besimtarë myslimanë në mbarë vendin kanë falur sot namazin në xhami apo dhe sheshe kryesore të qyteteve. Këtë Kurban Bajram për herë të parë besimtarët e Fierit kana falur namazin në qendër të qytetit. Falja u drejtua nga myftiu i qytetit Mikel Hazizoll. Myftiu përcolli mesazhin për më shumë paqe, mirësi, respekt e dashuri ndaj njeri-tjetrit dhe sidomos për më tepër besim, duke e konsideruar njeriun si pasurinë më të madhe të krijuar nga Zoti
Kurban Bajrami është kremtuar në Lushnje, Korçë, Pogradec, Elbasan dhe Bulqizë, ku mijëra besimtarë myslimanë kanë shkuar në xhami apo kanë falur namazin në sheshet kryesore. Në xhaminë “Iljas Bej Mirahori” të Korçës dhe në Xhaminë “Ebu Bekër” në Pogradec u fal Kurban Bajrami. Myftiu i Elbasanit Agim Duka përcolli mesazhe të paqes dhe vëllazërisë, tolerancës dhe solidaritet më të vobektet dhe ata që kanë më shumë nevojë.
Besimtarët e Beratit e falën namazin në sheshin “Republika”. Falja u drejtua nga imami Ferben Durra. Ai bëri thirrje për më shumë mirësi dhe dashuri ndërsa tha se Kurban Bajrami është dita e sakrificës dhe sinqeritetit, është një ditë e veçantë ku të gjithë besimtarët duhet të ndihmojnë jetimët e njerëzit në nevojë dhe duhet të respektojnë njëri-tjetrin.
