KURBIN– Një 15-vjeçar i identifikuar me inicialet L.Rr ka mbetur i plagosur në këmbë këtë të hënë, pasi është qëlluar me armë zjarri nga një 17-vjeçar i identifikuar me inicialet A.Gj, i cili është vënë në pranga pak orë pas ngjarjes. Shërbimet e Policisë Lezhë kanë njoftuar mbrëmjen e sotme se është gjetur dhe sekuestruar arma e krimit, e cila ishte hedhur në një parcelë toke, në afërsi të një ure në zonën e Sanxhakut.
NJOFTIMI I POLICISË:
Kurbin / Gjendet dhe sekuestrohet arma e zjarrit e përdorur nga autori në ngjarjen e ndodhur në Laç ku mbeti i plagosur një 15-vjeçar.
Në vijim të veprimeve të pandërprera hetimore dhe kontrolleve të shtuara me qëllim dokumentimin e plotë ligjor të ngjarjes së ndodhur rreth orës 12:20 ku jashtë rrethimit të gjimnazit, shtetasi A. Gj. ka plagosur me armë zjarri shtetasin L. Rr., u bë e mundur gjetja e armës së zjarrit e përdorur nga autori, të cilën e kishte hedhur për ta fshehur në një parcelë toke, në afërsi të një ure në Sanxhak.
Në cilësinë e provës materiale u bë sekuestrimi i armës së zjarrit si dhe disa fishekëve luftarakë të cilët iu gjetën në dhomën e tij gjatë kontrollit të banesës.
Shtetasi A. Gj. u arrestua në flagrancë për veprat penale ” Plagosje e rëndë me dashje” dhe “Prodhimi dhe mbajtja pa leje e armëve, armëve shpërthyese dhe municioneve luftarake”
Materialet procedurale u referuan në Prokurorinë e Rrethit Gjyqësor Kurbin për veprime të mëtejshme.
