“Ka qenë një mesazh dhe më përpara, e ka dhënë zëvendëskryeministri Bislimi diku te para 10 ditësh ose dy javësh, ka thënë që nuk ka nevojë Kosova për ndërmjetës, se ndërmjetës ka sa të duash të tjerë që ofrohen, por ka nevojë për ndihmë dhe mbështetje.
Po të jetë për ndërmjetës, ka palë të tjera sa të duash, por Kosova me Shqipërinë duke qenë një komb, identiteti, kultura, historia, e njëjtë. Kosova pret tjetër gjë nga Shqipëria. Tani, nëse kryeminstri i Shqipërisë vjen në Kosovë me idenë që ‘unë jam ndërmjetës dhe mediator i Ballkanit’, atëherë unë mendoj se duke qenë se Kurti është ai që udhëheq dialogun, ai nuk mund të dakordohet me mediatorë, me të cilët nuk është dakorduar më përpara se do jenë mediator.
Në rast se Rama ka vendosur të bëjë mediatorin, atëherë duhet thënë që mediatori është mirë të mos jetë arrogant me palët, të mos jetë i padrejtë, për të fituar besueshmërinë si mediator.
Ndërsa nëse vjen si vëlla, nëse vjen si kryeministër i Shqipërisë, që është vendi më i rëndësishëm për Kosovën, atëherë Rama duhet të vinte jo duke kërkuar falje mbase, por duke riorganizuar takimin mes dy qeverive dhe jo duke bërë sikur nuk ka ndodhur asgjë. Le të themi që aktualisht shqetësimi kryesor i Kosovës është që të sqarojë situatën e saj, sepse ne mendojmë se masat që janë marrë ndaj Kosovës janë të padrejta, fokusi është të sqarohet kjo padrejtësi dhe të hiqen këto masa. Në këtë pikë është e papranueshme që Kosovës t’i vijë presioni nga vendi që pret mbështetjen më të madhe”.
Albin Kurti, refuzoi takimin me Edi Ramën, i cili do të jetë nesër në Prishtinë, nga ku do të nisë turin ballkanik në kuadër të përgatitjeve të samitit për Procesin e Berlinit, që pritet të mbahet në tetor në Tiranë. Në një konferencë për mediat në Kosovë, Albin Kurti i kërkoi Ramës zhvillimin e mbledhjes së përbashkët ndërmjet dy qeverive, në të kundët nuk e takon. – tha Arbër Zaimi.
