Kryeministri Edi Rama ka propozuar Evis Salën si Ministre të re të Shëndetësisë dhe Mbrojtjes Sociale. Sala pritet të marrë detyrën në kabinetin e ri qeveritar, duke zëvendësuar Albana Koçiu.
Kryeministri Rama vlerëson eksperiencën e gjerë akademike dhe profesionale të Zonja Salës, veçanërisht në imazhimin diagnostik dhe radioterapinë onkologjike, si dhe angazhimin e saj si pedagoge në universitete të jashtme dhe në Shqipëri.
Profili i Evis Salës:
Prof. Dr. Evis Sala është një nga figurat më të njohura në fushën e imazherisë onkologjike në nivel ndërkombëtar.
Prof. Dr. Evis Sala shërbeu si Rektore Themeluese e Universitetit Western Balkans (2022–2025), duke vendosur themelet akademike dhe strategjike të institucionit.
Aktualisht, ajo drejton Qendrën për Imazheri Diagnostike dhe Radioterapi Onkologjike në Poliklinikën Gemelli dhe është pedagoge në Universitetin Western Balkans, ku kontribuon me përvojën e saj akademike dhe kërkimore për formimin e brezit të ri të profesionistëve të shëndetit.
Prof. Sala ka një karrierë të gjatë akademike dhe kërkimore në Mbretërinë e Bashkuar, ku për shumë vite ka qenë pjesë e Universitetit të Kembrixhit dhe ka bashkë-drejtuar Programin e Avancuar të Imazhimit të Kancerit dhe Programin e Integruar të Mjekësisë së Kancerit në Qendrën e Kërkimit të Kancerit në Kembrixh.
Kërkimi i saj shkencor fokusohet në zhvillimin e biomarkerëve funksionalë të imazhit për vlerësimin e shpejtë të përgjigjes ndaj trajtimit të kancerit, duke përdorur imazhe fiziologjike dhe metabolike të habitatit të tumorit. Fushat e saj të ekspertizës përfshijnë radiogjenominë, integrimin e imazherisë kuantitative me gjenomikën, proteomikën dhe metabolomikën, si dhe përdorimin e inteligjencës artificiale për rindërtim dhe analizë të avancuar të të dhënave.
Ajo është gjithashtu një mentore dhe oratore e shquar, e angazhuar në edukimin dhe frymëzimin e profesionistëve të rinj të mjekësisë dhe shkencës.
