TIRANË– Gjykata Kushtetuese ka shtyrë seancën e parashikuar të mbahet këtë të mërkurë për padinë e grupit të deputetëve të Partisë Demokratike në lidhje me Vendimin e Këshillit të Ministrave për ndërtimet pa leje. Shkak për këtë shtyrja është bërë një kërkesë që Kushtetuesja ka pasur për deputetët. Trupa gjykuese ka kërkuar që 28 deputetët e PD-së të firmosin një autorizim për palën që do t’i përfaqësojë.
Vendimi i Gjykataës Kushtetuese është kundërshtuar fort nga deputeti demokrat Gazment Bardhi. Jashtë Kushtetueses Bardhi u shpreh se çështja e autorizimit bëhet për të zvarritur procesin gjyqësor. Bardhi shkoi më tej duke akuzuar Gjykatën Kushtetuese se është peng i kryeministrit Edi Rama. Deputetët demokratë kërkojnë shfuqizimin e VKM-së për rregullat dhe procedurat për konfiskim për interes publik të objekteve të ndërtuara për qëllime përfitimi.
Gazment Bardhi: E njëjta trupë gjykuese, e bërë nga të 9 gjyqtarë të Gjykatës, ka vendosur një standard të ri gjykimi duke e shtyrë edhe më tej këtë çështje. Deri më sot 28 deputetët e grupit parlamentar kanë ardhur me një autorizim të lëshuar nga kryetari i grupit. Kështu jemi përfaqësuar edhe para një jave, edhe në një tjetër vendim të shpallur para një muaji. Ndërkohë që sot na u bë me dije që përfaqësimi duhet të ishte me një autorizim të firmosur nga 28 deputetët e Kuvendit. Nëse do na e kishin thënë para një jave, do të kishim ardhur me firmat dhe çështja nuk do të ishte zvarritur. Shantazhi me twitter i z. Rama ka mbërritur në Gjykatën Kushtetuese. Një pjesë e këtyre e kanë marrë qartë mesazhin e Kryeministrit lidhur me këtë çështje. Kjo është e rëndë. Nuk ka ndodhur kurrë që një Gjykatë Kushtetuese të marrë mesazhe të tilla mafioze. Kjo është edhe arsyeja pse herë pas herë vendos standarde të tjera. Nëse janë të shantazhuar të na e bëjnë me dijë që të mos harxhojmë ne kohë ndërkohë që vendim i merr Kryeministri dhe oligarkët. Ka një shantazh të drejtpërdrejtë të Edi Ramës dhe kjo gjë ndodh. Kjo është hera e parë që ndodh. Ka një praktikë 32-vjeçare. Gjithmonë jemi përfaqësuar me firmën e kryetarit të grupit ose në mungesë të tij nga nënkryetari i grupit. Edhe znj. Kokona vjen këtu si përfaqësuese e Këshillit të Ministrave me një firmë të Kryeministrit dhe jo me Vendim të Këshillit të Ministrave. Ne s’e kemi ngritur si pretendim sepse ka qenë kjo praktika 32-vjeçare.
