TIRANË– Pas votimit në Kuvend ku iu hap rrugë arrestimit të tij, Kuvendi i ka dërguar zyrtarisht Prokurosisë së Posaçme Kundër Korrupsionit dhe Krimit të Organizuar dokumentin e heqjes së imunitetit për deputetin socialist Arben Ahmetaj. Kërkesa e SPAK u votua me 117 vota PRO dhe 3 ABSTENIM.
Prokuroria e Posaçme Kundër Korrupsionit dhe Krimit të Organizuar (SPAK) i ka kërkuar Kuvendit më datë 10 korrik 2023 heqjen e mandatit të ish-ministrit të Financave tashmë deputet i PS dhe lejen për arrestimin e tij. Arben Ahmetaj, ish-numri dy i qeverisë Rama akuzohet nga SPAK për tre vepra penale: “Mosdeklarim apo fshehje të pasurive”, “Korrupsion pasiv” si dhe “Pastrim parash”.
