TIRANË– Detaje të reja janë zbardhur katër muaj pas zbulimit të laboratorit të drogës në Frakull të Fierit, mësohet se gjatë operacionit ku u kap 485 kg kokainë ka pasur edhe të shtëna me armë. Gjatë kohës që agjentët e Byrosë Kombëtare të Hetimit, ato të Policisë së Shtetit në koordinim me SPAK dhe DEA-n amerikane, ndodheshin në terren duke survejuar perimetrin dhe gjurmuar përgjegjësit, ka pasur të shtëna me armë zjarri.
Raportohet se agjentët civilë ishin vendosur në terren disa kohë para se të bëhej ndërhyrja me qëllim survijimin e personave që merreshin me aktivitetin kriminal.
Bëhet me dije se Çervanakët konstatuan lëvizjet e dyshimta, dhe në një moment është hapur zjarr me armë në drejtim të agjentëve për shkak se kanë dyshuar se janë në rrezik. Pas 15 minutash është vendosur të ndërhyhej për shkak se drejtuesit e operacionit kanë arsyetuar se në të kundërt mund të rrezikohej jeta e agjentëve apo operacioni të dështonte.
Disa prej tyre u kapën në flagrancë, ndërsa disa persona të tjerë arritën të largoheshin, mes tyre, kimisti kolumbian Zamir Rodriguez. Atij iu bë sinjalizim të ndalonte nga Policia Rrugore, me argument kontroll rutinë pranë qytetit të Lushnjes, por ai nuk është bindur, duke u larguar me shpejtësi. Më pas, për herë të fundit është lokalizuar në zonën e Vorës, dhe pasi është futur pranë në një zonë rurale pranë lumit të Gjolës, ka humbur çdo kontakt pamor.
Operacioni u zhvillua më 24 nëntotr të vitit të shkuar dhe në pranga ranë 10 persona mes tyre dhe ish-kryekomunari Viktor Çervanakiu. Lajmi fillimisht u raportua nga mediatr e Malit të Zi aty ku dhe nisi operacioni, i cili më pas u shtri në Frakull ku dhe u zbulua droga.
Të arrestuarit janë: Zenel Cervanaku, i cili akuzohet se është edhe porositësi i kësaj sasie kokaine; Viktor Çervanaku, ish-kryetari i komunës së Frakullit, djali i tij së bashku me të fejuarën, Denilson Çervenaku dhe Enxhi Ferhati; Klajdi Vrioni (Kodra), 32 vjeç, i dënuar më parë për armëmbajtje pa leje dhe për plagosje të rëndë; Redion Meshi, 22 vjeç; Marildo Rona, Nikolin Gjolena, Julian Malaj dhe Bledar Matoshi. Në kërkim është shpallur kolumbiani Zaimir Rodrigez, i cili dyshohet se kishte ardhur në Shqipëri për të bërë ndarjen e kokainës nga plehu kimik.
