TIRANË– Shtatë ditë pas vdekjes tragjike të stjuardesës Greta Dyrmishin në bordin e një prej avionëve të flotës së “Air Albania” kompania ka reaguar për herë të parë ditën e sotme. Në një postim në Facebook kompania bën me dije se e reja ka ndërruar jetë si pasojë e atakut kardiak. Më tej kompania bën me dije se në respekt të së ndjerës ata vendosën që lajmin për vdekjen e saj ta ndanin në një moment të përshtatshëm. Në fund “Air Albania” shkruan se ata janë pranë familjes dhe do të vazhdojnë që tu qëndrojnë pranë.
REAGIMI:
“Më 21 Dhjetor, pasi zbritëm të gjithë udhëtarët e fluturimit drejt Londrës, një nga anëtarët e ekipit të kabinës, Greta Dyrmishi pësoi atak kardiak. Pavarësisht të gjithë asistencës mjekësore të ofruar në moment, ne përsëri e humbëm. Air Albania ka kontaktuar familjen e saj që në momentet e para dhe vazhdojmë të jemi pranë tyre në këto momente të vështira. Në respekt të Gretës dhe familjes së saj ne vendosëm ta ndajmë lajmin me publikun në momentin më të përshtatshëm. Në do ta kujtojmë gjithmonë Gretën si një profesioniste të pasionuar, një bashkëpunëtore të shkëlqyer dhe mikeshë shumë të mirë e të gjithëve ne. Me besimin se ajo sot gjendet mes mëshirës së Zotit, Air Albania do të vazhdojë t’i qëndrojë pranë familjes”.
