KORÇË– Një person ka rënë në prangat e Policisë së Korçës ndërsa pesë të tjerë janë vënë nën hetim pasi akuzohen për vepra të ndryshme penale. Përmes një njoftimi për mediat Policia bën me dije se një 43-vjeçar në Pogradec është arrestuar pasi ka dhunuar fizikisht prindërit e moshuar. Ndërsa dy persona janë vënë nën hetim pasi kanë goditur një person. Një 31-vjeçar është shpallur në kërkim pasi dyshohet se ka ushtruar dhunë psikologjike dhe ka fyer, nëpërmjet celularit, ish-partneren e tij. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
NJOFTIMI I POLICISË:
DVP Korçë/Vihet në pranga 1 shtetas, procedohen në gjendje të lirë 5 shtetas dhe shpallet në kërkim 1 tjetër, për vepra të ndryshme penale.
-Specialistët për Hetimin e Krimeve të Komisariatit të Policisë Korçë referuan materialet në Prokurori ku filloi procedimi në gjendje të lirë për shtetasit B. Gj., 36 vjeç dhe E. L., 23 vjeç, të dy banues në Korçë, si dhe për shtetasin G. M., 41 vjeç, banues në fshatin Kamenicë, Korçë, pasi në lagjen nr. 9, Korçë, në bashkëpunim me njëri-tjetrin, dyshohet se për shkak të një konflikti të çastit, kanë goditur një 30-vjeçar.
-Specialistët për Hetimin e Krimeve të Komisariatit të Policisë Maliq referuan materialet në Prokurori ku filloi procedimi në gjendje të lirë për shtetasin A. F., 64 vjeç dhe për bashkëshorten e tij, shtetasen V. F., 57 vjeçe, të dy banues në fshatin Kakaç, Maliq, pasi dyshohet se kanë kanosur me fjalë, bashkëshorten e vëllait të 64-vjeçarit.
-Po këta specialistë referuan materialet në Prokurori dhe shpallën në kërkim shtetasin E. Ll., 31 vjeç, banues në fshatin Mborje, Korçë, pasi dyshohet se ka ushtruar dhunë psikologjike dhe ka fyer, nëpërmjet celularit, ish-partneren e tij. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
