TIRANË– Detaje të reja kanë dalë nga aksioni i RENEA-s dhe Forcave të Ndërhyrjes së Shpejtë në shtëpinë e të shumëkërkuarit të drejtësisë Ervis Martinaj në Fushë-Kuqe. Sipas gazetares Klodiana Lala familja e Ervis Martinajt po përgatitej për hakmarrje, nisur nga sasia e madhe e municioneve luftarake të gjetura në shtëpinë e tij dhe të xhaxhallarëve të tij. E ftuar në “News 24” këtë dyshim Lala e përforcon kur thotë se dy njerëz me lidhje krushqie me ish-bosin e lojërave të fatit kanë marrë në dorë menaxhimin e bizneseve të Martinajt.
“Mua nuk më bën përshtypje gjetja e municioneve luftarake, dihej kjo, ata po përgatiteshin. Xhaxhallarët e tij janë shoqëruar në polici dhe do merren në pyetje, jam e bindur që ata do të thonë që nuk kishin asnjë dijeni për amrët. Mendoj që ata janë duke u riorganizuar, kjo nisur dhe nga fakti që dy njerëz me lidhje krushqie me Martinajn janë kontrolluar dhe shoqëruar në polici së fundmi. Ata kanë marrë nën menaxhim bizneset e Martinajt,”- tha Lala.
