Edhe pak ditë na ndajnë nga fillimi i vitit të ri shkollor 2023-24 ku shumë nxënës do të ulen për herë të parë në bangat e shkollës duke nisur kështu rrugëtimin e bukur drejt dijes. Edhe këtë vit, si çdo vit tjetër paraqiten probleme në disa shkolla të vendit. Ndër to probleme është edhe mungesa e stafit mësimor. Një problematikë e tillë është identifikuar në njësitë administrative të zonës së Dukagjinit, konkretisht në Pult, Shosh dhe Shalë. Briselda Kadija, drejtore e ZVA-së Shkodër e konfirmoi këtë mungesë, ndërsa tha se edhe në shkolla të tjera të Shkodrës, ka nevojë për ndërhyrje në infrastrukturë dhe bazë materiale. Ja si shprehet ajo:
“Do kemi shkolla edhe këtë vit që do e zhvillojnë mësimin me turne. Kemi pesë shkolla, që janë tre në qytet dhe dy në njësi administrative. Kemi shkolla në mes të qytetit që vit pas viti, janë bërë meremetime dhe sistemime, por kanë nevojë për ndërhyrje, ka nevojë për ndërhyrjen e shkollës së Thethit. Në zonën e Thethit kemi një problematikë, që shpeshherë kemi pasur probleme me plotësimin me personel mësimor, janë krijuar hapësira për të pasur vende vakante për mësues, por largësia e këtyre zonave nga qyteti e ka bërë shpeshherë të pamundur për të ofruar shërbimin arsimor atje”.
Gjithashtu këtë vit vihet re një ulje e numrit të nxënësve të regjistruar në shkolla si pasojë e shumë faktorëve. Sipas ZVA-së ndër këta faktorë nuk është vetëm ai i largimit, por edhe ai i uljes së lindshmërisë, si dhe interesi i nxënësve, të cilët preferojnë të zhvendosen dhe të shkojnë në zonat e tjera të Shqipërisë.
