TIRANË– Avokati Elton Laska deklaron se harta e re gjyqësore ka ndikuar negativisht në rrethet gjyqësore.
Në emisionin “Stay Tuned” me moderatoren Valbona Mhilli në MCN Tv, ai tha se nuk ka sjellë ndryshime për Tiranën, por për gjithë rrethet e tjera dhe ka mbingarkuar Gjykatën e Apelit Tiranë.
“Me organikë Gjykata e Apelit Tiranë duhet të kishte 70 gjyqtarë dhe aktualisht ka 17 gjyqtarë, çka tregon se ata e kanë të pamundur. Kanë mbi 30 mijë dosje që rrezik nuk i gjejnë nëpër rafte. Kjo penalizon ata që vuajnë dënimet, që kanë çështje civile në gjykatë për të zgjidhur dhe lihen pas dore në mënyrën më të papranueshme dhe detyrohen të merren me çështje penale se ka afate. Por nuk kemi vetëm çështje penale, por kemi dhe halle civile. Kemi familje që kanë bërë zgjidhje martese dhe kanë 5 vite në Apele. Praktikisht ngelen pa martuar me të tjerë se nuk zgjidhin dot një çështje civile. Duhet ta marrësh me të mirë bashkëshortin ose bashkëshorten, se po përfundove në Apel zor se zgjidhet martesa”.
