Erling Haaland është një “përbindësh”, në sensin e mirë të fjalës. Sulmuesi viking, ka thyer çdo parashikim për sa I përket përshtatjes së tij me futbollin anglez.
Çdo skepktit që filloi të kritikonte Manchester City-n, për blerjen e tij, pas finales së humbur në Community Shield, me siguri tashmë do këtë ndryshuar mendim.
Me 35 gola në fanellën e Manchester Cityt, pas fitores 3-0 ndaj West Ham United, në një ndeshje të mbetur nga java e 28-të, ylli norvegjez po kalon një sezon fantastik.
Në minutën e 71-të, i nisur në mënyrë ideale nga Jack Grealish, ai mundi të shënojë në portën e Lukasz Fabianski.
Kështu, Erling Haaland tejkaloi rekordet e arritura nga Andy Cole dhe Alan Shearer në Premier League, të cilët kishin shënuar secili nga 34 gola për Newcastle në sezonin 1993-94, respektivisht për Blackburn në sezonin pasardhës.
Elita e futbollit anglez atëherë kishte 22 ekipe dhe sezoni përfshinte 42 ndeshje. Premier League u reduktua në 20 klube nga sezoni 1995-96.
Haalandit iu deshën vetëm 31 ndeshje për të vendosur këtë rekord, ndërsa Cole dhe Shearer luajtën përkatësisht 40 dhe 42 ndeshje. Superylli norvegjez ka 51 gola të shënuar në të gjitha garat këtë sezon.
Pas këtij rezultati, Alan Shearer dhe Gary Lineker shkëmbyen mesazhe në rrjetet sociale pas paraqitjes spektakolare të ‘Vikingut’ të Cityt.
“Rekordi i Premier League për Erling Haaland, 35 gola. Është një çmenduri. Mendimet janë me Alan Shearer në këtë moment të vështirë”, ka shkruar Lineker, ndërsa ish-sulmuesi i Anglisë ka reaguar menjëherë: “Nuk mund të kisha dashur më shumë, që të bëhej nga ky djalë i këndshëm. U deshën vetëm 28 vjet. Ai është më i miri!”.
