Udhëheqësit e G7 janë takuar për bisedime në Tokio në kuadër të luftës Izrael-Hamas.
Ministrat e Jashtëm, përfshire Antony Blinken të SHBA-së, kanë deklaruar për mediat duke dënuar Hamasin, dhe siç pritej, kanë mbështetur të drejtën e Izraelit për vetëmbrojtje dhe kanë bërë thirrje për “pauza humanitare”.
Në deklaratë, kombet kërkuan të balancojnë kritikat ndaj sulmeve të Hamasit kundër Izraelit, si dhe kanë kërkuar veprim urgjent për të ndihmuar civilët në enklavën e rrethuar palestineze.
Ministrat e Jashtëm nga SHBA, Britania e Madhe, Kanadaja, Franca, Gjermania, Japonia dhe Italia thanë se “mbështesin pauzat humanitare për të lehtësuar ndihmën e nevojshme urgjente, lëvizjen civile dhe lirimin e pengjeve”.
Nevoja për pauza humanitare dhe jo për një armëpushim të përgjithshëm ka qenë subjekt i një debati të ashpër ditët e fundit, me shumë vende perëndimore që sugjerojnë se kjo e fundit mund të minojë dhe pengojë Izraelin dhe të drejtën e tij për të mbrojtur veten.
Ka pasur raporte të përhapura për palestinezët që ikin nga toka e tyre në Bregun Perëndimor nën kërcënimin e dhunës nga kolonët izraelitë, shkruan SkyNews.
Ministrat e cilësuan këtë “të papranueshme” dhe thanë se “minon sigurinë në Bregun Perëndimor dhe kërcënon perspektivat për një paqe të qëndrueshme”.
