Komisioni Parlamentar për Çështjet Ligjore, Administratën Publike dhe të Drejtat e Njeriut miratoi ndryshimet në ligjin “Për lojërat e fatit”. Zëvendësministrja për Ekonominë dhe Financat, Vasilika Vjero, e cila prezantoi pr/ligjin në komision, bëri të ditur se rikthimi i kategorisë së basteve sportive do të jetë vetëm në formën online.
“Qëllimi kryesor i projektligjit është rikthimi i kategorisë së basteve sportive, por tashmë vetëm në formën online me qëllim formalizimin e tregut të lojërave të fatit për këtë kategori loje, duke licencuar subjekte të cilat kanë eksperiencë në ushtrimin e aktivitetit “baste sportive”.
Po ashtu, garantimi për përdorimin e të ardhurave të mbledhura nga aktiviteti i basteve sportive online në mbështetjen direkte në fushën e sportit, kulturës, inovacionit dhe teknologjisë së inovacionit por dhe financimin e programeve të mbrojtjes së lojtarit”, tha Vjero.
Vjero bëri të ditur se licencimi për kompanitë do të jetë 10-vjeçar, ndërsa tarifa do të dyfishohet duke shkuar në 400 milionë lekë.
Sipas saj, licencimi do të bëhet me garë, nëpërmjet sistemit të pikëzimit, nëpërmjet krijimit të komisionit të licencimit si një strukturë kolegjiale vendimmarrëse.
Projektligji ndër të tjera propozon krijimin e garancive për shlyerjen e detyrimeve periodike ndaj AMLF-së, organit tatimor etj. Në këtë rast organizatori i kategorisë “Baste sportive online” është i detyruar të ngurtësojë një fond prej 50 000 000 (pesëdhjetë milionë) lekësh, në një llogari të veçantë bankare, në favor të AMLF-së, i cili zhbllokohet vetëm me urdhër të ministrit përgjegjës për financat.
Deputeti Asllan Dogjani bëri të ditur se qeveria dështoi në parandalimin e luajtjes së lojërave të fatit, pasi tregu i zi është veprimtari kriminale. Sipas tij, pasojat do të jenë edhe më të mëdha.
Ndërkohë, kryetarja e Komisionit, Klotilda Bushka bëri të ditur se janë hartuar amendamente të cilat do t’i bashkëngjiten raportit të Komisionit në formën e komenteve dhe do të diskutohen gjatë miratimit nen për nen në Komisionin e Ekonomisë dhe Financave që është komisioni përgjegjës.
/ Newszone
