Deri në 13,000 ushtarë ukrainas janë vrarë që nga fillimi i pushtimit rus, ka bërë me dije këhsilltari i presidentit Zelensky, Mykhailo Podolyak. Ai tha se midis 10,000 dhe 13,000 trupa kanë vdekur.
Është e rrallë që Ukraina të japë shifra për viktimat dhe komentet e Podolyak nuk janë konfirmuar nga ushtria e vendit.
Muajin e kaluar, gjenerali më i lartë amerikan, Mark Milley, tha se rreth 100,000 ushtarë rusë dhe 100,000 ukrainas ishin vrarë ose plagosur që nga fillimi i luftës.
Në një fjalim video të mërkurën, kryetarja e Komisionit të BE-së Ursula Von der Leyen tha se 100,000 trupa ukrainase ishin vrarë. Megjithatë, një zëdhënës i Komisionit të BE-së më vonë sqaroi se ky ishte një gabim, dhe shifra i referohej të vrarëve dhe të plagosurve.
Duke folur për kanalin televiziv ukrainas Channel 24, Podolyak tha se Kievi “po flet hapur për numrin e të vrarëve.”
“Ne kemi vlerësime zyrtare nga Shtabi i Përgjithshëm, vlerësime zyrtare nga komandanti i përgjithshëm (Zelensky) dhe ato variojnë nga 10,000 deri në 12,500-13,000 të vrarë”, tha ai.
Von der Leyen tha se 20,000 civilë ukrainas ishin vrarë. Ndërsa ky numër nuk u tërhoq nga Komisioni i BE-së, ai u hoq nga versionet e mëvonshme të videos së bashku me pohimin se 100,000 trupa ishin vrarë.
