Disa vende kanë evakuuar diplomatët dhe qytetarët nga kryeqyteti i Sudanit ndërsa luftimet e ashpra vazhdojnë në Khartoum.
SHBA dhe Britania e Madhe njoftuan të dielën se kishin larguar diplomatët jashtë vendit.
Italia, Belgjika, Turqia, Japonia dhe Holanda thanë se po organizonin gjithashtu evakuime, duke filluar nga e diela.
Një autokolonë franceze thuhet se u sulmua ndërsa përpiqej të largohej nga ambasada dhe u desh të kthehej.
Ushtria Legjitime e Sudanit dhe kundërshtarët e saj – një forcë paraushtarake e quajtur Forcat e Mbështetjes së Shpejtë (RSF) – fajësuan njëri-tjetrin për sulmin.
Autoritetet franceze refuzuan të komentojnë nëse kishte ndodhur një sulm – por ata thanë se ushtria franceze me bazë në Xhibuti ishte e përfshirë në operacion dhe se qëllimi ishte të çonte të evakuuarit në këtë shtet.
Ministria franceze e punëve të jashtme tha se po evakuonte gjithashtu shtetasit e saj dhe shtetasit e vendeve të tjera të BE-së dhe aleatëve.
Autoritetet amerikane thanë se kishin transportuar më pak se 100 njerëz me helikopterë Chinook të dielën në mëngjes në një operacion “të shpejtë dhe efikas”.
Në një telefonatë me gazetarët pas misionit, gjenerali Douglas Sims tha se më shumë se 100 trupa amerikane nga Navy Seals dhe Forcat Speciale të Ushtrisë fluturuan nga Xhibuti në Etiopi dhe më pas në Sudan dhe ishin në terren për më pak se një orë.
Megjithëse nuk ka një armëpushim formal, duket se RSF-ja ka rënë dakord të mos qëllojë ndaj helikopterëve amerikanë gjatë misionit të tyre.
Ambasada amerikane në Khartoum tani është e mbyllur dhe një postim në Twitter në burimin e saj zyrtar thotë se nuk është mjaft e sigurt që qeveria të evakuojë qytetarët civilë amerikanë.
