CIA nën mandatin e presidentit amerikan Donald Trump ka dërguar fshehurazi dronë MQ-9 Reaper mbi Meksikë për të spiunuar dhe goditur kartelet e drogës.
Dronët MQ-9, të përdorur për misionet nuk janë aktualisht të armatosur. Por ato mund të pajisen më vonë për të kryer sulme me saktësi të lartë, raporton CNN, që tregon se SHBA i përdor rregullisht ato për të shënjestruar terroristët në Siri, Irak dhe Somali.
Disa zyrtarë aktualë dhe të mëparshëm thonë se përcaktimi i karteleve si grupe terroriste mund të jetë shkëndija për sulme të drejtpërdrejta të SHBA-së kundër karteleve dhe laboratorëve të tyre të drogës në Meksikë.
CIA ka përdorur dronë për të sulmuar kartelet brenda Meksikës edhe më parë, sipas një programi partner me autoritetet meksikane.
Por, fluturimet më të fundit iu komunikuan Kongresit nga administrata Trump duke përdorur një njoftim të veçantë të rezervuar për programe të reja që CIA synon ose t’i fshehë ose t’i mohojë, tha një burim i njohur me çështjen. Në njoftime nuk përmendeshin partnerët meksikanë.
CIA nuk pranoi të komentojë në mënyrë specifike në lidhje me misionet e dronëve. Por një zëdhënës tha se “luftimi i karteleve meksikane dhe rajonale të drogës është një prioritet për CIA-n si pjesë e përpjekjeve të administratës Trump për t’i dhënë fund trafikimit të narkotikëve. Drejtori John Ratcliffe është i vendosur të vërë në punë ekspertizën unike të CIA-s kundër kësaj sfide të vështirë.”
Qeveria meksikane tashmë po shtron pyetje rreth asaj se pse avionët spiun ushtarak amerikan kanë kryer misione pranë kufirit javët e fundit.
Në përgjigje të raportimit të CNN në lidhje me rritjen e fluturimeve të avionëve spiun ushtarak që fluturojnë pranë Meksikës, presidentja meksikane Claudia Sheinbaum dhe zyrtarë të tjerë të lartë meksikanë kanë theksuar ditët e fundit rëndësinë e sovranitetit dhe se ato fluturime po ndodhin në hapësirën ajrore ndërkombëtare dhe mbi territorin amerikan.
Ministri i Mbrojtjes Ricardo Trevilla tha se nuk ishte në dijeni për fluturime me avionë spiunazhi.
“Ne nuk mund të themi nëse janë avionë spiunazhi apo jo sepse nuk e dimë saktësisht se çfarë është bërë. Megjithatë, ata nuk shkelën hapësirën ajrore kombëtare”, tha Trevilla javën e kaluar
Të premten, në përgjigje të një pyetjeje rreth rritjes së fluturimeve të avionëve të SHBA-së në hapësirën ajrore ndërkombëtare, Sheinbaum tha: “Gjëja e rëndësishme këtu është që ata të ndajnë informacione me Meksikën”.
Fluturimet me dron të CIA-s, si dhe emërtimi ligjërisht si i karteleve si “grupe terroriste”, tregojnë se si administrata Trump po punon për të aktivizuar një gamë të gjerë autoritetesh dhe burimesh kundër karteleve përgjatë kufirit SHBA-Meksikë dhe brenda vetë Meksikës.
Planifikimi për ndryshimin filloi që para se Trump të merrte detyrën. Një dokument i planifikimit të tranzicionit prej 30 faqesh i titulluar “Plani i Veprimit të Agjencive 2025”, përshkruante prioritetet e para të administratës Trump për të riprogramuar burimet kundër terrorizmit.
“Trajtoni punën kundër karteleve të drogës si një luftë kundër terrorizmit dhe përdorni ato autoritete dhe burime unike në mënyrë të përshtatshme, duke përfshirë lëvizjen e resurseve nga rajone të tjera nëse është e nevojshme“, shkruhej në dokument.
